గాయత్రీ జయంతి విశిష్టత - గాయత్రీ మంత్ర పద అన్వయం Gayatri Jayanti Greetings to all

🌹. గాయత్రీ జయంతి విశిష్టత - గాయత్రీ మంత్ర పద అన్వయం 🌹

🌲. గాయత్రి జయంతి శుభాకాంక్షలు మిత్రులందరికీ.. 🌲

ప్రసాద్ భరద్వాజ

🍀. గాయత్రీ జయంతి 🍀

జ్యేష్ట శుక్ల ఏకాదశి నాడు హిందువులు గాయత్రీ జయంతిని ఘనంగా జరుపుతారు. అన్ని మంత్రాలలో గొప్ప మంత్రం గాయత్రీ మంత్రం. ఈ మంత్రాన్ని పఠించే వ్యక్తి జీవితంలో ఎప్పుడూ నిరాశ పడరని పురాణాల్లో వివరించారు. నాలుగు వేదాల సృష్టికి ముందు బ్రహ్మ 24 అక్షరాలతో కూడిన గాయత్రీ మంత్రాన్ని రచించాడని చెబుతారు. వేదమాత గాయత్రీదేవి మంత్రాన్ని బ్రహ్మర్షి విశ్వామిత్రుడు ప్రవచించిన రోజు కనుక ఈ రోజుని గాయత్రీ జయంతి గా పేర్కొంటారు. ఉపనయనం అయినవారు ఈ రోజున గాయత్రీ మంత్రాన్ని తప్పనిసరిగా జపిస్తారు.

🌺. గాయత్రీ జయంతి పూజ విధానం: 🌺

గాయత్రీ జయంతి రోజు తెల్లవారుజామున నిద్రలేచి తలస్నానం చేయాలి. అనంతరం ఇంట్లో దీపం వెలిగించి.. గంగాజలంతో అన్ని దేవతలకు అభిషేకం చేయాలి. ఆపై గాయత్రి మాతని ధ్యానిస్తూ.. గాయత్రీ మంత్రాన్ని జపించాలి. అమ్మవారికి పూలు సమర్పిస్తూ గాయత్రీ తల్లిని ఆరాధించాలి. అమ్మకు సాత్విక వస్తువులు మాత్రమే సమర్పించాలి.

🌹. గాయత్రీ మంత్రం పద అన్వయం 🌹

📚. ప్రసాద్‌ భరధ్వాజ

మూల అర్ధం : ఏ పరమాత్మ మా యొక్క బుద్ధి శక్తిని చైతన్యవంతం చేస్తున్నాడో, అట్టి దేవుని యొక్క శ్రేష్ఠమైన తేజస్సును (మా స్వరూపంగా) భావిస్తున్నాము.

విశ్వామిత్ర మహర్షి లోకానికి అనుగ్రహించిన మంత్రం గాయత్రీ మంత్రం.

'గాయంతం త్రాయతే ఇతి గాయత్రీ' అని శబ్దకల్పద్రుమం అనే నిఘంటువు గాయత్రీ శబ్దం యొక్క వ్యుత్పత్తి అర్థాన్ని చెప్పింది. ఈ మంత్రాన్ని జపించేవాడిని ఇది రక్షిస్తుంది అని అర్థం. ఎలా రక్షిస్తుంది అంటే జ్ఞానాన్ని ఇచ్చి రక్షిస్తుంది. మిగతా మంత్రాలకూ, దీనికీ తేడా ఏమిటి అంటే మనం సాధారణంగా ఏదో ఒక దేవతా స్వరూపాన్ని ఉద్దేశించి, లేదా ఏదో ఒక కోరికను మనసులో ఉంచుకొని అనేక మంత్రాల్ని జపిస్తుంటాం.

గాయత్రీ మంత్రంలో అలాంటి కోరికలేమీ లేవు. ఈ విశ్వ సృష్టికి అంతటికీ మూలమైన భగవంతుని తత్త్వము మన అంతఃకరణలోనే ప్రతిఫలిస్తుందనీ, ఆ తత్త్వం కంటే మనం వేరు కాము అనీ ఈ మంత్రం యొక్క అర్థం.

ఓం భూర్భువస్వః తత్సవితుర్వరేణ్యం భర్గోదేవస్య ధీమహి ధియో యో నః ప్రచోదయాత్.

ఇది మంత్రం. దీన్ని పదవిభాగం చేస్తే ఈ క్రింది విధంగా ఉంటుంది.

తత్, సవితుః, వరేణ్యం, భర్గః, దేవస్య, ధీమహి, ధియః యః నః, ప్రచోదయాత్.

పదాల్ని ఇలాగ అన్వయం చేసుకోవాలి.

యః, నః, ధియః, ప్రచోదయాత్, తత్, దేవస్య, సవితుః, వరేణ్యం, భర్గః, ధీమహి.

ఏ పరమాత్మ మా యొక్క బుద్ధి శక్తిని చైతన్యవంతం చేస్తున్నాడో, అట్టి దేవుని యొక్క శ్రేష్ఠమైన తేజస్సును (మా స్వరూపంగా) భావిస్తున్నాము.

ఈ అర్థాన్ని ధ్యానించడం అంటే మనసుకు పట్టించుకోవడం. ఇది గాయత్రీ మంత్రం ఉద్దేశం. ఈ భావాన్ని మనసుకు తెచ్చుకోవడం వల్ల మనిషి తనలోని దైవత్వాన్ని గుర్తు చేసుకుంటూ ఉంటాడు. కేవలం తనలోని దైవత్వమే కాక అన్ని ప్రాణుల్లోని దైవత్వాన్ని చూడగలుగుతాడు. అతని ప్రతి పనీ పరిశుద్ధంగా, లోకహితాన్ని కోరుతూ ఉంటుంది.

🌹 🌹 🌹 🌹 🌹