నవ దుర్గల ఆరాధన - తృతీయ దుర్గ – చంద్రఘంట దేవి (Worship of the Nava Durgas – The Third Durga – Goddess Chandraghanta)

https://www.facebook.com/groups/chaitanyavijnanam/posts/2277657636354038

🌹🔱 3. నవ దుర్గల ఆరాధన - తృతీయ దుర్గ – చంద్రఘంట దేవి - అన్నపూర్ణాదేవి విశిష్టత, ప్రార్థనా శ్లోకాలు, ఆరాధనా విధానం - పురాణ గాధ 🔱🌹

✍️ ప్రసాద్ భరద్వాజ

🌹🔱 3. Worship of the Nava Durgas – The Third Durga: Goddess Chandraghanta – Significance of Goddess Annapurna, Prayer Verses, Method of Worship, and Puranic Legend 🔱🌹

✍️ Prasad Bharadwaj

ఆరాధనా దినం: మూడవ రోజు | సంప్రదాయ రంగు: బూడిద రంగు

చంద్రఘంటాదేవి శిరస్సుపై గంటాకారంలో కనిపించే అర్ధచంద్రుడిని ధరించి ఉంటుంది. అందుకే ఆమెకు చంద్రఘంట అనే పేరు వచ్చింది. సింహవాహినిగా, పది హస్తాలతో వివిధ ఆయుధాలను ధరించి దర్శనమిచ్చే ఈ దేవి ధైర్యానికి, అప్రమత్తతకు, దుష్టశక్తులను ఎదుర్కొనే పరాక్రమానికి ప్రతీక.

ఆమె రూపం శాంతి, శక్తి రెండూ పరస్పర విరుద్ధాలు కావని తెలియజేస్తుంది. అంతరంగంలో ప్రశాంతతను నిలుపుకుంటూనే అన్యాయాన్ని ఎదుర్కొనే ధైర్యం కలిగి ఉండాలని చంద్రఘంట తత్త్వం బోధిస్తుంది.

🌼 చంద్రఘంట ప్రార్థనా శ్లోకం

పిండజప్రవరారూఢా చండకోపాస్త్రకైర్యుతా ।

ప్రసాదం తనుతే మహ్యం చంద్రఘంటేతి విశ్రుతా ॥

శక్తివంతమైన వాహనంపై ఆసీనురాలై, దుష్టశక్తులను సంహరించే ఆయుధాలను ధరించిన చంద్రఘంటాదేవి నాకు అనుగ్రహాన్ని ప్రసాదించుగాక.

అలంకారం: అన్నపూర్ణాదేవి – పసుపు రంగు

అన్నపూర్ణాదేవిని అన్నదానానికి, పోషణకు, సమస్త జీవుల పట్ల కరుణకు ప్రతీకగా పూజిస్తారు. అన్నపూర్ణా అలంకారంలో అమ్మవారిని దివ్యాభరణాలతో, పుష్పాలతో అలంకరించి, అన్నసమృద్ధి మరియు లోకక్షేమం కోసం ప్రార్థిస్తారు.

🌼 అన్నపూర్ణా గాయత్రీ మంత్రం

ఓం అన్నపూర్ణాయై విద్మహే జగన్మాత్రే చ ధీమహి । తన్నో దేవీ ప్రచోదయాత్ ॥

జగత్తుకు తల్లియైన అన్నపూర్ణాదేవిని ధ్యానిస్తున్నాము. ఆమె మా జీవితాల్లో అన్నసమృద్ధిని, దయను, సేవాభావాన్ని ప్రసాదించుగాక.

🌻. శ్రీ అన్నపూర్ణా దేవి స్తోత్రం

నిత్యానందకరీ వరాభయకరీ సౌందర్యరత్నాకరీ

నిర్ధూతాఖిలదోషపావనకరీ ప్రత్యక్షమాహేశ్వరీ |

ప్రాలేయాచలవంశపావనకరీ కాశీపురాధీశ్వరీ

భిక్షాం దేహి కృపావలంబనకరీ మాతాన్నపూర్ణేశ్వరీ ||

నైవేద్యం: క్షీరాన్నం, దద్దోజనం, గారెలు లేదా కుటుంబ సంప్రదాయానుసారమైన ప్రసాదం.

🌷పురాణ కధ.

దుర్గామాతయొక్క మూడవ శక్తి నామము ‘చంద్రఘంట’. నవరాత్రి ఉత్సవాలలో మూడవరోజున ఈమె విగ్రహానికే పూజాపురస్కారాలు జరుగుతాయి. ఈ స్వరూపము మిక్కిలి శాంతిప్రదము, కల్యాణ కారకము. ఈమె తన శిరమున దాల్చిన అర్ధచంద్రుడు ఘాంటాకృతిలో ఉండటంవల్ల ఈమెకు ‘చంద్రఘంట’ అనే పేరు స్థిరపడింది. ఈమె శరీరకాంతి బంగారువన్నెలో మిలమిలలాడుతుటుంది. తన పది చేతులలో – ఖడ్గము మొదలయిన శస్త్రములను, బాణము మున్నగు అస్త్రములను ధరించి ఉంటుంది. సర్వదా సమరసన్నాహయై యుద్ధముద్రలో ఉండే దివ్య మంగళ స్వరూపం. ఈమె గంటనుండి వెలువడే భయంకర ధ్వనులను విన్నంతనే క్రూరులైన దుష్టులు గడగడలాడిపోతారు.

నవరాత్రి దుర్గాపూజలలో మూడవ రోజు సేవ మిక్కిలి మహిమోపేతమైనది. ఆ రోజు సాధకుని మనస్సు మణిపూరక చక్రాన్ని ప్రవేశిస్తుంది. చంద్రఘంటాదేవి కృపవలన ఉపాసకునికి దివ్య వస్తు సందర్శనం కలుగుతుందని చెబుతారు. దివ్య సుగంధ అనుభవము కూడా సిద్ధిస్తుంది. అలాగే వివిధాలైన దివ్యధ్వనులు కూడా వినిపిస్తాయి. ఈ దివ్యానుభవ అనుభూతికొరకు, సాధకుడు సావధానుడై ఉండాలి.

ఈ మాత కృపవలన సాధకుని సమస్త పాపాలూ, బాధలూ తొలగిపోతాయి. ఈమె ఆరాధన సద్యః ఫలదాయకము. ఈమె నిరంతరమూ యుద్దసన్నద్ధురాలై ఉన్నట్లు దర్శనమిస్తుంది కనుక భక్తుల కష్టాలను అతి శీఘ్రముగా నివారిస్తుంది. ఈ సింహవాహనను ఉపాసించేవారు సింహసదృశులై పరాక్రమశాలురుగా నిర్భయులుగా ఉంటారు. ఈమె ఘాంటానాదము సంతతము భక్తులను భూతప్రేతాది బాధలనుండి కాపాడుతూ ఉంటుంది. ఈమెను సేవించినంతనే శరణాగతుల రక్షణకై అభయఘంట ధ్వనిస్తూ ఉంటుంది.

ఈ దేవీ స్వరూపము దుష్టులను అణచివేయటంలో, హతమార్చుటంలో అను క్షణమూ సన్నద్ధురాలై ఉండునదే; అయినప్పటికీ భక్తులకూ, ఉపాసకులకూ ఈమె స్వరూపము మిక్కిలి సౌమ్యముగానూ, ప్రశాంతముగానూ కనబడుతూ ఉంటుంది. ఈమెను ఆరాధించడంవల్ల సాధకులలో వీరత్వ నిర్భయత్వములతోపాటు సౌమ్యతా, వినమ్రతలు పెంపొందుతుంటాయి. వారి నేత్రాలలోని కాంతులు, ముఖవర్చస్సు, శరీర శోభలు ఇనుమడిస్తూ, సద్గుణములు వృద్ధిచెందుతుంటాయి. వారి కంఠస్వరములలో అలౌకికమైన దివ్యమాధుర్యము రాశిగా ఏర్పడుతుంది. చంద్రఘంటాదేవిని భజించేవారు, ఉపాసించేవారు ఎక్కడికి వెళ్ళినా వారిని దర్శించిన వారందరూ సుఖశాంతులను పొందుతారు. ఇలాంటి ఉత్తమ సాధకుల శరీరాలనుండి దివ్యమూ, ప్రకాశవంతమూ అయిన తేజస్సు బహిర్గతము అవుతూ ఉంటుంది. ఈ దివ్య ప్రక్రియ సామాన్యులదృష్టికి గోచరించదు. కానీ ఉత్తమ సాధకులూ, వారి అనుయాయులు మాత్రము వీటిని గ్రహించి, అనుభూతిని పొందగలరు.

మనము త్రికరణశుద్ధిగా విధ్యుక్తకర్మలను ఆచరిస్తూ, పవిత్రమైన అంతఃకరణ కలిగి చంద్రఘాంటాదేవిని శరణుజొచ్చి, ఆమెను ఉపాసించడానికీ, తత్పరులమై ఉండాలి. అలాంటి ఉపాసన ప్రభావము వల్ల, మనము సమస్త సాంసారిక కష్టములనుండి విముక్తులమై, సహజంగానే పరమపద ప్రాప్తికి అర్హులమవుతాము. నిరంతర దేవి ధ్యానము మనకు ఇహపర లోకాలలో పరమ కల్యాణదాయకమై సద్గతులను ప్రాప్తింపజేస్తుంది.

🌹 🌹 🌹 🌹 🌹