హనుమజ్జయంతి - విజయోత్సవం - భక్తి, బలం, సేవకు ప్రతీక విశిష్టత (Happy Hanuman Jayanti - "Vijayothsavam")
- Prasad Bharadwaj
- 13 hours ago
- 2 min read
🌹 హనుమజ్జయంతి విజయోత్సవం భక్తి, బలం, సేవకు ప్రతీక విశిష్టత 🌹
✍️ ప్రసాద్ భరధ్వాజ
మనోజవం మారుత తుల్యవేగం జితేంద్రియం బుద్ధిమతాం వరిష్ఠమ్ ।
వాతాత్మజం వానరయూథముఖ్యం శ్రీరామదూతం శిరసా నమామి ॥
మనస్సువలె వేగంగా ఉండే వాడు, గాలివలె వేగశక్తి కలవాడు, ఇంద్రియాలను జయించినవాడు, జ్ఞానుల్లో శ్రేష్ఠుడు, వాయుదేవుని పుత్రుడు, వానరసేనాధిపతి, శ్రీరాముని దూత అయిన హనుమంతుడికి నేను నమస్కరిస్తున్నాను.
హిందూ ధర్మంలో అత్యంత పవిత్రమైన పండుగలలో ఒకటైన హనుమజ్జయంతి విజయోత్సవం, పరాక్రమానికి, నిస్వార్థ సేవకు, అచంచల భక్తికి ప్రతీక అయిన శ్రీ ఆంజనేయ స్వామివారు సీతమ్మ వారిని లంకలో కనుగొన్న దినంగా అత్యంత భక్తిశ్రద్ధలతో జరుపుకుంటారు. ఈ పర్వదినం “విజయోత్సవం” భావించ బడుతుంది. శ్రీరాముడు అయోధ్యకు పట్టాభిషిక్తుడైన తరువాత సీతమ్మను సరియైన కాలంలో కనుగొని, ధర్మానికి, సత్యానికి, భక్తికి సాధించిన విజయాల ప్రతీకగా, ఈ ధర్మ కార్యంలో తనకు అత్యంత సహాయం చేసిన హనుమంతునికి, చైత్ర పౌర్ణమి నాడు ఘనంగా విజయోత్సవం నిర్వహించాడని కూడా చెబుతారు. అప్పటి నుండి ఈ విజయోత్సవం మనం నిర్వహించుకుంటున్నాం.
హనుమద్విజయోత్సవం : ఉత్తరాది వారికి చైత్ర పూర్ణిమ హనుమజ్జయంతి. దానినే మనవారు హనుమద్విజయోత్సవం అంటారు. ఒరియా ప్రజలు మేష సంక్రాంతినాడు హనుమజ్జయంతి జరిగినట్లు భావిస్తారు. తమిళనాట మార్గశిర అమావాస్య నాడు హనుమజ్జయంతిని నిర్వహిస్తారు. మార్గశిరంలోనే శుద్ధ త్రయోదశి తిథిని కన్నడ ప్రజలు జరుపుకుంటారు. ఆనాడే తెలుగునాట హనుమద్ర్వతం చేసుకునే ఆచారం ఉంది. జ్యేష్ఠమాసంలో సువర్చలా హనుమంతుల కల్యాణం నిర్వహిస్తారు.
శ్రీ హనుమంతుడు వాయుదేవుని పుత్రుడిగా, అంజనాదేవి గర్భంలో అవతరించిన దివ్య శక్తి. బాల్యంలోనే అపారమైన బలం, ధైర్యం, జ్ఞానం కలిగి ఉన్నాడు. ఆయన సూర్యునిని ఫలమని భావించి దానిని తినడానికి ఎగిరిన సంఘటన ఆయన అసామాన్య శక్తిని తెలియజేస్తుంది. కానీ అదే సమయంలో వినయం, నియంత్రణ, గురుభక్తి వంటి లక్షణాలను కూడా ఆయన ప్రదర్శించాడు. ఈ లక్షణాలే ఆయనను ఇతరుల కంటే ప్రత్యేకంగా నిలిపాయి.
రామాయణంలో హనుమంతుడి పాత్ర అత్యంత కీలకం. శ్రీరాముని పట్ల ఆయనకు ఉన్న భక్తి అచంచలమైనది. సీతాదేవిని కనుగొనడం, లంకలో ప్రవేశించడం, రాక్షసులను సంహరించడం, లంకను దహనం చేయడం వంటి కార్యాలు ఆయన పరాక్రమాన్ని ప్రతిబింబిస్తాయి. ముఖ్యంగా సముద్రాన్ని దాటిన ఘట్టం ఆయన సంకల్పబలం మరియు ధైర్యానికి నిదర్శనం. ఈ విజయాలన్నీ ఈ హనుమజ్జయంతిని “విజయోత్సవం”గా భావించే కారణం.
చైత్ర మాసంలో వచ్చే పౌర్ణమిని ‘మహా చైత్రి’ అని కూడా పిలుస్తారు. చైత్ర పౌర్ణమి నాడే.. రావణ సంహారం తర్వాత అయోధ్యకు తిరిగి వచ్చిన శ్రీరాముడు.. హనుమంతుడి సీతమ్మను సరియైన కాలంలో కనుగొని చేసిన సాయానికి కృతజ్ఞతగా పెద్ద ఎత్తున విజయోత్సవం జరిపిన రోజుగా పురాణాలు చెబుతున్నాయి.
హనుమజ్జయంతి రోజున భక్తులు ఉపవాసం ఉంటూ, ఆంజనేయ స్వామి ఆలయాలకు వెళ్లి ప్రత్యేక పూజలు చేస్తారు. “హనుమాన్ చాలీసా”, “సుందరకాండ” పారాయణం చేస్తూ భక్తులు ఆయన అనుగ్రహాన్ని కోరుకుంటారు. కొంతమంది తమ శక్తి మేరకు అన్నదానం చేసి, సేవా కార్యక్రమాలలో పాల్గొంటారు. ఈ రోజు హనుమంతుడి ఆశీస్సులతో భయం తొలగి, ధైర్యం పెరిగి, జీవితంలో విజయాలు సాధిస్తామని విశ్వసిస్తారు.
“శ్రీ రామదూతాయ హనుమతే నమః” అనే మంత్రాన్ని కనీసం 21 సార్లు పఠించడం వల్ల రక్షణ మరియు విజయం లభిస్తాయి.
హనుమంతుడు కేవలం బలానికి ప్రతీక మాత్రమే కాదు, ఆత్మశక్తి, ధర్మబద్ధత, గురుభక్తి, సేవాభావం వంటి విలువల ప్రతిరూపం. ఆయన జీవితం మనకు ఒక గొప్ప సందేశం ఇస్తుంది – “భక్తి ఉంటే అసాధ్యం అనే దే లేదు.” హనుమజ్జయంతి సందర్భంగా మనం కూడా ఆయన గుణాలను ఆచరిస్తూ, మన జీవితంలో ధర్మమార్గంలో నడవాలని సంకల్పించాలి.
ఈ విధంగా హనుమజ్జయంతి విజయోత్సవం మనకు భక్తి, ధైర్యం, సేవ, వినయం అనే నాలుగు ప్రధాన విలువలను గుర్తుచేసే పవిత్రమైన పర్వదినంగా నిలుస్తుంది. శ్రీ ఆంజనేయ స్వామివారి కృపతో అందరికీ ఆయురారోగ్యాలు, సుఖసంతోషాలు, విజయాలు కలగాలని ప్రార్థిస్తూ…జై శ్రీ రామ్! జై హనుమాన్!
✍️ ప్రసాద్ భరధ్వాజ
🌹🌹🌹🌹🌹
Join and Follow
Comments